Almudassir Media Centre

Adat katumanggungan

Stuktur Bangun Pidato Pasambahan Adaik Minang Kabau

Jikok kito sigi bana jalannyo sabuah pidato pasambahan adaik dari awa sampai akhia. Mako, sacaro struktur genetik kecek rang kini, susun bangun pidato pasambahan nantun bisa disusun manjadi tigo (3). Nan partamo, kato pambukak, yoitu bagian pambukak-an nan barisi “tigo limbago nan tajali”, nan kaduo batang tubuah, yoitu isi rundiangan, nan katigo, kato panutui, iolah barisi etika kutiko ka pulang.

1.   Kato Pambukak

Kato pambukak pidato pasambahan ko tadiri dari tigo (3) kato kunci, nan di dalam pidato pasambahan diistilahkan jo tigo limbago nan tajali. Nan partamo, sambah-manyambah, nan kaduo baso jo basi, nan katigo, siriah jo pinang.

Mukasuik dari katigo (3) limbago di ateh alah diurai pado surahan tadahulu nan judulnyo “Pidato Pasambahan Adaik”, tapeknyo pado sub kajian (1) Hakikaik Pidato Pasambahan Adaik (liek: http://hendrizalman.blogspot.com/2012/09/pidato-pasambahan-adaik.html#.UrR8TPQW3VQ). Karano itu, surah-manyurah tantangan konsep indak lai dikaji. Pokok kaji di siko dipusekkan ka pamaparan babarapo contoh.

a.    Sambah Manyambah

Sambah-manyambah ko ruponyo tabilang banyak. Babarapo contohnyo bisa dicaliak pado contoh di bawah

1)   Datuak/Angku…..(namo tokoh nan patuik), bari ijin Ambo manyambah”

2)   “Sikaduduak di ateh parik, sarumpun jo bilang-bilang, wahai angku nan duduak balirik, indak ka Ambo atok indak ka Ambo bilang. Jo jari tasusun sambah Ambo sampaikan”.

3)   “Sungguahpun Angku surang nan dihadang dek pasambahan. Rapeklah handaknyo kapado sagalo nan mujuik di rumah tango nan ko. Tarutamo, niniak jo mamak, ka pai tampek batanyo, ka pulang tampek babarito. Alim jo ulama, nan manunjuak maaja kapado nan baiak, nan malarang managah taradok nan mungka. Camin nan indak namuah kabuik, palito nan indak namuah padam. Jo salam sambah disampaikan”.

b.   Baso jo Basi

Baso jo basi biasonyo diwujuikkan jo istilah “mambana”, yoitu manunjuakkan karandahan hati malalui ungkapan-ungkapan baso-basi. Misanyo;

Tantangan badan diri Ambo, nan ka manjadi khalifah nan khadim sarato wakia nan mutalak hanyolah biduak ketek nan baru sudah, pakakeh nan balun langkok bana. Kok balayia manapi-napi bakato di bawah-bawah. Ka tangah takuik dek galombang, ka tapi takuik dek buayo. Umua alun satahun jaguang, darah balun satampuak pinang. Pulang maklum Ambo banakan kapado sagalo hadirin malalui badan diri Angku”.

c.    Sirih jo Pinang

Siriah jo pinang manuruik pasa nan biaso adolah tando kasapakatan dari pihak nan mambaonyo. Makonyo, mukasuik siriah jo pinang di siko mangacu kapado katarangan/pambaritahuan baraso kato nan ka disampaikan tukang pidato/juru baso iolah hasia kasapakatan/rundiangan basamo pihak pangka/alek. Ciek dari sakian banyak contohnyo:

Bak pituah urang tuo-tuo, nan banamo Basa Ampek Balai;Indomo di Saruaso, Tuan Titah di Sungai Tarab, Tuan Kadi di Padang Gantiang, Tuan Gadang di Baitpuah. Nan  mancari bulek nan sagolong, picak nan salayang. Kato nan sapakaik rundiangan nan saiyo, iyo di alam Minangkabau. Satantang jo itu juo, lah sapakaik pulo nan tuo-tuo sabalah pangka taradok badan diri ambo untuk manyampaikan kato malalukan rundingan kapado Alek nan tatumbuak ka bakek diri Angku. Adopun ruponyo iolah tantangan...(niaik si pangka)”.

2.   Batang Tubuah (Isi)

Batang tubuah pidato pasambahan adaik tagantuang kapado jinih acaranyo. Pendek kato, batang tubuah ko banyak ruponyo. Namun, bisa dikalompokkan manjadi duo, yoitu; pidato pasambahan makan-minum jo pidato pasambahan nan manjadi niaik utamo dari si pangka.

Tantangan nan banyak di ateh, bisa dicaliak pado surahan tadahulu nan bajudul “Pidato Pasambahan Adaik, sub bab 2, Jinih Pidato Pasambahan Adaik”(liek: http://hendrizalman.blogspot.com/2012/09/pidato-pasambahan-adaik.html#.UrR8TPQW3VQ). Sadangkan pado sajian nan kini ko, sabagai contoh Kito katangahkan batang tubuah dari pidato batagak gala mudo, yoitu:

Disabuik musim panambai, dikana musim dahulu, maso di Pariangan Padang Panjang. Bukik banamo Maropalam, di dalam luhak Tanah Data, di galanggang nan barajok di medan nan bapaneh. Di sinan lah duduak Datuak Katumanggungan jo  Datuak Parpatiah Nan Sabatang, langkok jo Basa Ampek Balai sarato Niniek jo Mamak, Alim jo Ulama jo Tuanku. Mancari kato nan sapakaik rundingan nan saiyo, iyo di alam Minangkabau. Batatapan nan jo itu, iyoah sapakaik pulo Kami, ateh namo selang nan bapangka karajo nan bapokok taradok badan diri anak-kamanakan Kami. Tantangan anak-kamanakan Kami nantun; kok ketek raso lah gadang, lah tibo mungkin jo patuik, lah ka naiak ka rumah urangMako, tadirilah hutang dek Kami nan sagalo Mamak, takaik sako mudonyo. Bak pituah rang tuo-tuo; anak itiek anak angso, dibari batali aka, jikok ketek dibari namo, lah gadang dibari gala. Keteknyo banamo… (namo), gadang ka Kami bari gala … (ga mudo)Namun sungguahpun baitu, karano adaik mamareso, adaik rundiang bamufakaik, sifaik pituah dari Angku nan Kami mintak mah. Nak tanang pulo hati kami”.

3.   Kato Panutuik

Kato kudian iolah bagian pidato pasambahan adaik tantangan etika kutiko nio pulang maninggakan tampek acara. Bagian pasambahan takaik iko isinyo biasonyo duo (2) sajo. Nan partamo pamoohan maaf, raso tarimokasih, syukur, nan kaduo pamintaan supayo dibari ijin pulang. Contoh ruponyo bisa dilieh di bawah ko.

Lalok sakalok barasian, maju salangkah ganjua suruik, suruiknyo ka pangka jalan, pangkanyo adaik jo limbago. Tantangan itu, di kami nan sagalo alek, lah kami pakaikan manuruik nan biaso; kok imbau lah kami sahuti, panggia lah kami hadiri. Jauah lah kami jalang, dakek lah kami silau, sampai ka rumah tanggo nanko. Kok tibo kami lah baduduakkan, dinanti jo lapiak nan tabantang janiah, lampu nan tapasang tarang. Jikok lapiak kini lah kumuah, rimah taserak di atehnyo. Tantangan itu, Mooh sarato raso tarimo kasih kami sampaikan kapado silang nan bapangka karajo nan bapokok malalui badan diri Angku. Salanjuiknyo, tantangan kami nan sagalo alek, kalau diumpamokan ka buruang banyak; pueh malayang jo malayok, hinggok di padang ribu-ribu. Minum ambun nan satitiek sarato mamakan buah rumpuik. Badan litak rasolah kanyang, hawuih rasolah pueh, nak tabang kutiko bak kini manuju pinang nan sabatang, pulang ka asa mulo jadi. Samintaro kaki lai basitumpu, sabalum kapak kadikirai, izin dimintak bakek Angku mah. Sakian Angku”.  

Posting Komentar

MKRdezign

Formulir Kontak

Nama

Email *

Pesan *

Diberdayakan oleh Blogger.
Javascript DisablePlease Enable Javascript To See All Widget