Almudassir Media Centre

Sambah makan

Panitahan kamakan

(Sipangka)

Sungguahpun sutan nan disambah, nak sarapeknyolah inyiak mamak sagaji guru sado malatak-mananaikan , tampek ambo manibokan sambah.  Indak diatok dibilang gala, ka pambilang kapaatok josambah sajo ambo muliakan. …Bukan toh ambo bak raso kamalinteh, kamalampau, Dari karajo nan bapokok silang nan bapangka, Sungguahpun diambo tarabiknyo sambah, lah izin kato jo munfakaik untuk manibokan buah pasambahan kabakeh sutan.

 Sambah juo tibo kapado sutan.

Adopun sambah nan kaditibokan kapado sutan nan bak kini hari. Kok jauah jalang manjalang - kok ampia turuik manuruik ,kok jauah alah bajalang, kok ampia alah baturuik.

Janjang tatagak alah batingkek, bandua tarantang alah batapiak, lapiak takambang alah bakaduduak-i. duduak dinan saamparan- tagak dinan saedaran- dirajo nan sadaulat dipangulu nan saundiko. Jikok manimbang sapanjang adat, mangaji sapanjang alua, yo basiang diateh nantumbuah, manimbang diateh nan ado.

Aluran di juadah nan katangah, alah disusun dilatakan alah diatok disajikan ,alah diliek ilia jo mudiak ,alah dilengong kiri jo kanan ,alah cukuik salamaik samparono.

Tan kato lah cukuik salamaik samparono.

Bakain sagalo putiah

badeta taluak balango.

Jamba lah sudah, izin lah buliah

salamaik kito manyantapnyo.

Takilek padi nak rang pauah

ditanah mulo rang tugakan

Takilek aia dimangkuak basuah

tandonyo jamba kadimakan,

dek inyiak mamak sagaji guru, sado nan bakarapatan ditangah rumah. Sakianlah sambah ditibokan kabakeh sutan.

Jawaban sialek

Alah sampai sutan..

Sungguahpun sutan nan disambah, nak sarapeknyolah dikarajo nan bapokok, disilang nan bapangka. sado malatak mananaikan, tampaik ambo manibokan sambah.

Indak diatok dibilang gala, kapambilang kapaatok josambah sajo ambo muliakan.  Bukan to ambo bak raso kamalinteh kamalampau, dari  inyiak mamak sagaji guru, sado nan bakarapatan ditangah rumah - lah izin kato jo munfakat untuak manjawek buah panitahan sutan.

Panitahan juo tibo kabakeh sutan:

Kok jauah jalang manjanlang kok ampia turuik manuruik ,kok jauah alah bajalang, kok ampia alah baturuik. janjang tatagak alah batingkek bandua tarantang alah batapiak, lapiak takambang alah bakaduduak i. Duduak dinan saamparan tagak dinan saedaran, dirajo nan sadaulat dipangulu nan saundiko.

Jikok manimbang sapanjang adat, mangaji sapanjang alua, yo basiang diateh nan tumbuah, manimbang diateh nan ado.

Aluran dijuadah nan katangah alah disusun dilatakan alah diatok disajikan.alah diliek ilia jomudiak, alah dilengong kiri jo kanan alah cukuik salamaik samparono.tan kato lah cukuik salamaik samparono. Bakain sagaloputiah badeta taluak balango. Jamba lah sudah.. izin lah buliah ..salamaik kito manyantapnyo. Takilek padi nak rang pauah .ditanah mulo rang tugakan. Takilek aia dimangkuak basuah tandonyo jamba kadimakan, dek inyiak mamak sagaji guru, sado nan bakarapatan ditangah rumah.

Kan baitu bana buah panitahan sutan…

Sapanjang buah panitahan sutan alah dalam adat lingka pusako.sunguahpun alah dalam adat lingka pusako.ketek bacacah nak tabao, gadang balapah dalam adat

Rajo adat rajo ibarat, buatan rai indo puro. Elok kato dibao jo munfakat dijapuikan nan kabarinyo mananti sutan sakiro kiro.

Laikoh dalam adat sutan…

Jawaban nan pangka

Adopun sambah jo titah diamba gadang, dianjuang tinggi nan cako sajo digampali.nan manjadi buah panitahan sutan ..”KETEK BACACAH NAK TABAO, GADANG BALAPAH DALAM ADAT- RAJO ADAT RAJO IBARAT, BUATAN RAI INDO PURO. ELOK KATO DIBAO JO MUNFAKAT DIJAPUIKKAN NAN KABARINYO MANANTI SUTAN SAKIRO KIRO”.

Kan baitu bana buah panitahan sutan…

Sutan manjapuik kabarinyo sipaik mananti malah ambo…

(Sialek mampaiyokan)

Sutan…panitahan tibo kabakeh sutan…

Adopun sambah nan katibokan kabakeh sutan nan bak kini hari..Samaso dihari nan cako, lah baparmintaan pulo karajo nan bapokok disilang nan bapangka ,kapado inyiak mamak sagaji guru sado nan bakarapatan ditangah rumah. Nan manjadi parmintaan.”Iyo Basiang Diateh Nantumbuah, Manimbang Diateh Nan Ado. Aluran Di Juadah Nan Katangah, Alah Disusun Dilatakan Alah Diatok Disajikan, Alah Diliek Ilia Jo Mudiak, Alah Dilengong Kiri Jo Kanan ,Alah Cukuik Salamaik Samparono.Tan Kato Lah Cukuik Salamaik Samparono. Bakain Sagaloputiah Badeta Taluak Balango. Jamba Lah Sudah.. Izin Lah Buliah ..Salamaik Kito Manyantapnyo. Takilek Padi Nak Rang Pauah .Ditanah Mulo Rang Tugakan. Takilek Aia Dimangkuak Basuah Tandonyo Jamba Kadimakan, Dek Inyiak Mamak Sagaji Guru, Sado Nan Bakarapatan Ditangah Rumah. Taranta buah panitahan kabakeh ambo alah bajawab sakiro-kiro, maagak nan kabarinyo iko nan bajapuik sampaian kabakeh sutan….

(Jawab)

Alah sampai sutan.

Adopun sambah jo titah diamba gadang, dianjuang tinggi nan cako sajo digampali.nan manjadi buah panitahan sutan.”Samaso dihari nan cako, lah baparmintaan pulo karajo nan bapokok disilang nan bapangka ,kapado inyiak mamak sagaji guru sado nan bakarapatan ditangah rumah. Nan manjadi parmintaan.”Iyo Basiang Diateh Nantumbuah, Manimbang Diateh Nan Ado. Aluran Di Juadah Nan Katangah, Alah Disusun Dilatakan Alah Diatok Disajikan, Alah Diliek Ilia Jo Mudiak, Alah Dilengong Kiri Jo Kanan ,Alah Cukuik Salamaik Samparono.Tan Kato Lah Cukuik Samparono. Bakain Sagaloputiah Badeta Taluak Balango. Jamba Lah Sudah.. Izin Lah Buliah ..Salamaik Kito Manyantapnyo. Takilek Padi Nak Rang Pauah .Ditanah Mulo Rang Tugakan. Takilek Aia Dimangkuak Basuah Tandonyo Jamba Kadimakan, Dek Inyiak Mamak Sagaji Guru, Sado Nan Bakarapatan Ditangah Rumah. Taranta buah panitahan kabakeh sutan alah bajawab sakiro-kiro, maagak nan kabarinyo iko nan bajapuik sampaian kabakeh sutan….Kan baitu bana

Panitahan sutan alah didalam adat lingka pusako ,suguahpun alah dalam adat lingka pusako ado pulo manurut undang, Dek karano ambo duduak dihadapan niniak mamak sagaji guru nan baduo jo batigo.dijapuikan kabarinyo,mananti sutan sakiro-kiro laikoh banamo dalam adat sutan.

(Jawab1) alah sampai sutan..

Adopun sambah jo titah diamba gadang, dianjuang tinggi nan cako sajo digampali.nan manjadi buah panitahan sutan

Dek karano sutan duduak dihadapan niniak mamak sagaji guru nan baduo jo batigo. dijapuikan kabarinyo, mananti sutan sakiro-kiro laikoh banamo dalam adat “ kan baitu bana ..sutan

Tan kato tuan manjapuikkan kabarinyo… mananti lah ambo.)

(Baiyo 1) Ambo japuikkan….

(Mangumbalikan ka tampek baiyo)

Sutan…sambah kumbali kabakeh sutan…

Adopun sambah jo titah nan dikumbalikan nan bak kini hari…samaso diharinan cako lah tahanta dek sutan buah panitahan kabakeh ambo..Baa tibo diambo lah pakaian manuruik adaik.diadat kato baiyo, bajalanbamuah. kapado. .inyiak mamak sagaji guru. Manjadi buah jo bari dek baliau…

Nan bak tampuruang lego anam. Ambiak tigo tingga tigo, bilangan bak nantun juo.diambiak sicerek nan barangkai dipaluik aka sibio bio ,nan sahalai diambiak ka pangabek labiahnyo ambiak ka kulimdam. Alah dipaiyo dipatidokan , alah di paukua dipajangkokan alah disauak aia nan janiah alah dimintak kato nan bana. Kapado niniak mamak sagaji guru sado nan bakarapatan ditangah rumah. Pintak buliah kandak lai ka babari.. Sungguah pun pintak buliah kandak lai ka babari,

nak ilia kapayakumbuah baranti tantang pakan baso. Sungguahpun kami nan sutan suruah. Nan pangka basuah lah tangan Nak samo makan malah kito”. sakianlah panitahan dikumbalikan kabakeh sutan….

(Jawab)

Alah sampai sutan,..

Adopun sambah jo titah diamba gadang, dianjuang tinggi nan cako sajo digampali. Samaso diharinan cako lah tahanta dek Ambo buah panitahan kabakeh Tuan..Baa tibo di tuan  lah pakaian manuruik adaik.diadat kato baiyo, bajalan bamuah. Kapado inyiak mamak sagaji guru. Manjadi buah jo bari dek baliau…

Nan bak tampuruang lego anam. Ambiak tigo tingga tigo, bilangan bak nantun juo.diambiak sicerek nan barangkai dipaluik aka sibio bio nan sahalai diambiak ka pangabek labiahnyo ambiak ka kulimdam. Alah dipaiyo dipatidokan , alah di paukua dipajangkokan alah disauak aia nan janiah alah dimintak kato nan bana. Kapado niniak mamak sagaji guru sado nan bakarapatan ditangah rumah. Pintak buliah kandak lai ka babari.. Sungguah pun pintak buliah kandak lai ka babari,

nak ilia kapayakumbuah baranti tantang pakan baso. Sungguahpun kami nan sutan suruah. Nan pangka basuah lah tangan Nak samo makan malah kito”. Kan baitu bana sutan..

Panitahan sutan alah banamo dalam adat lingka pusako. Sungguahpun alah dalam adat, ado pulo manuruik undang: Diujan nan bapuhun di paneh nan barasa. Karano ambo batimbang jawek jo asanyo …Lah rancak diantakan kaasanyo  sutan.

(Jawab)

Adopun sambah jo titah diamba gadang, dianjuang tinggi nan cako sajo digampali. Nan manjadi buah panitahan sutan. Diujan nan bapuhun dipaneh nan barasa. Dek sutan batimbang jawek jo asanya. lapatuik dianta kaasanyo.. kan baitu bana sutan,,

Kok bana sapai jo sutan lah kasinan tibonyo…

Ambo antaan…

Sialek….

---------------------------------------------------------------------------

( sialek mangumbalikan ka sipangka kapalo koto)

Sutan…sambah kumbali kabakeh sutan…

Adopun sambah jo titah nan dikumbalikan nan bak kini hari…samaso diharinan cako lah tahanta dek sutan buah panitahan kabakeh ambo..Baa tibo diambo

Nan bak tampuruang lego anam. Ambiak tigo tingga tigo, bilangan bak nantun juo.diambiak sicerek nan barangkai dipaluik aka sibio bio nan sahalai diambiak ka pangabek labiahnyo ambiak ka kulimdam. Alah dipaiyo dipatidokan , alah di paukua dipajangkokan alah disauak aia nan janiah alah dimintak kato nan bana. Kapado niniak mamak sagaji guru sado nan bakarapatan ditangah rumah. Pintak buliah kandak lai ka babari.. Sungguah pun pintak buliah kandak lai ka babari,

nak ilia kapayakumbuah baranti tantang pakan baso. Sungguah pun kami nan sutan suruah. Nan pangka basuahlah tangan. Nak samo makan malah kito”.sakianlah panitahan kabakeh sutan….

JAWABAN NAN PANGKA)

Alah sampai buah panitahan sutan…

Adopun sambah jo titah diamba gadang, dianjuang tinggi nan cako sajo digampali.nan manjadi buah panitahan sutan ..

Nan bak tampuruang lego anam. Ambiak tigo tingga tigo, bilangan bak nantun juo.diambiak sicerek nan barangkai dipaluik aka sibio bio nan sahalai diambiak ka pangabek labiahnyo ambiak ka kulimdam. Alah dipaiyo dipatidokan , alah di paukua dipajangkokan alah disauak aia nan janiah alah dimintak kato nan bana. Kapado niniak mamak sagaji guru sado nan bakarapatan ditangah rumah. Pintak buliah kandak lai ka babari.. sungguah pun . Pintak buliah kandak lai ka babari, nak ilia kapayakumbuah baranti tantang pakan baso. Sungguahpun kami nan sutan suruah. Nan pangka basuah lah tangan. Nak samo makan malah kito.

Kan baitu bana buah panitahan sutan…

Ba tibo diambo.

Barabah tabang katiku maraok kadalam sawah.

Dipadi mulonyo makan.

kok pintak lah samo buliah kandak lah samo balaku, tantangan buah panitahan kito baduo.

Lah patuik kito bari parantian

Sakianlah sambah kumbali pado sutan.

(JAWABAN SIALEK)

Adopun sambah jo titah diamba gadang, dianjuang tinggi nan cako sajo digampali.nan manjadi buah panitahan sutan ..

“barabah tabang katiku

maraok kadalam sawah.

Dipadi mulonyo makan.

kok pintak lah samo buliah,

kandak lah samo balaku,

tantangan buah panitahan kito baduo.

Lah patuik kito bari parantian”

kan baitu bana buah panitahan sutan.

Dek sutan lah takana diambo lah takiro. lah kasinan tibono sutan.

(Sipangka) Bismillah kito mulai…

(Sialek) Alhamdulillahkito tutuik...

Posting Komentar

MKRdezign

Formulir Kontak

Nama

Email *

Pesan *

Diberdayakan oleh Blogger.
Javascript DisablePlease Enable Javascript To See All Widget